ភ្នំពេញ៖ ច្បាប់ស្ដីពីការវិនិយោគនៃព្រះរាជាណាចក្រកម្ពុជាត្រូវបានព្រះមហាក្សត្រប្រកាសដាក់ឱ្យប្រើប្រាស់កាលពីថ្ងៃទី១៥ ខែតុលា កន្លងទៅ។ ច្បាប់នេះត្រូវបានរៀបចំឡើងក្នុងគោលបំណងបង្កើតនូវក្របខ័ណ្ឌគតិយុត្តដែលបើកចំហ មានតម្លាភាព អាចប៉ាន់ប្រមាណទុកជាមុនបាន ប្រកបដោយភាពអំណោយផលសម្រាប់ការវិនិយោគ ដើម្បីទាក់ទាញ និងលើកកម្ពស់ការវិនិយោគនៅក្នុងប្រទេសកម្ពុជា។
ច្បាប់ស្ដីពីការវិនិយោគនៃព្រះរាជាណាចក្រកម្ពុជាមាន ១១ជំពូកនិង៤២មាត្រា ដែលបានធានានិងការពារវិនិយោគិនពីការផ្ដល់សំណងប្រសិនជារងការខូចខាតដោយសារជម្លោះប្រដាប់អាវុធ ឬកលិយុគស៊ីវិល ឬការដាក់ប្រទេសក្នុងភាពអាសន្ន ច្បាប់នេះក៏ធានាមិនឱ្យមានការរំលោភបំពានដោយរដ្ឋទៅលើទ្រព្យសម្បត្តិរបស់វិនិយោគិន និងមិនត្រូវធ្វើការដកយកគម្រោងដែលវិនិយោគិនទទួលបានការអនុម័តឡើយ។
ច្បាប់នេះក៏អនុញ្ញាតឱ្យុអ្នកវិនិយោគអាចទិញ និងបង្វិលរូបិយបណ្ណទៅបរទេសបានដោយសេរី និងធានានូវកម្មសិទ្ធិបញ្ញារបស់វិនិយោគិនឱ្យបានម៉ឺងម៉ាត់ផងដែរ។
វិនិយោគិនដែលមកវិនិយោគនៅកម្ពុជានឹងត្រូវអនុញ្ញាតឱ្យទទួលបានការស្នាក់នៅបណ្ដោះអាសន្នរយៈពេលវែងសម្រាប់ខ្លួនឯងនិងក្រុមគ្រួសារក្នុងអំឡុងនៃគម្រោងរបស់ខ្លួនមានប្រតិបត្តិការ និងទទួលបានសិទ្ធិសុំបណ្ណការងារនិងសៀវភៅការងារសម្រាប់ខ្លួនឯងនិងសម្រាប់និយោជិតបរទេសរបស់ខ្លួន។
ក្រៅពីការការពារទាំងនេះ ច្បាប់នេះក៏បានលើកទឹកចិត្តអ្នកវិនិយោគជាមួយការលើកលែងពន្ធដារ និងពន្ធគយទាំងស្រុង ឬមួយផ្នែកណាមួយផងដែរ។
ច្បាប់ស្ដីពីការវិនិយោគនៃព្រះរាជាណាចក្រកម្ពុជាត្រូវបាន សម្ដេចតេជោ ហ៊ុន សែន បង្ហើបក្នុងពិធីមួយកាលពីខែធ្នូ ឆ្នាំ២០១៩ ដោយថាច្បាប់នេះនឹងក្លាយជាមូលដ្ឋានគតិយុត្តិ បើកចំហ មានតម្លាភាព ប្រសិទ្ធភាព និងភាពស្មើគ្នាក្នុងការវិនិយោគនៅកម្ពុជា ទាក់ទាញ និងផ្តល់វិសាលភាពដល់វិនិយោគិន ក៏ដូចជាផ្ដល់នូវប្រយោជន៍ដល់ប្រទេសកម្ពុជាផងដែរ៕
